വസ്ത്രം

നഗ്നത
ഒരില
രണ്ടില
മരത്തോൽ
തുണി
വസ്ത്രം
ഉടുത്താൽ ഉടുക്കുന്നവനു നാണം മറയും
ചിലരുടുത്താൽ കാണുന്നവനു നാണം വരും
ഉടുക്കുന്നതിലുണ്ടു ഫാഷൻ
ഉടുക്കാതിരിക്കുന്നതിലുമുണ്ടു ഫാഷൻ
ആകെ മൂടിയുടുക്കുന്നതും മതാചാരം
ഒന്നുമുടുക്കാതിരിക്കുന്നതും മതാചാരം
ഇല്ലാത്തവൻ കീറിയതുടുക്കുന്നു
അതു നഗ്നത
ഉള്ളവൻ ഉടുക്കാൻ വാങ്ങിയതു കീറി ഉടുക്കുന്നു
അതു ഫാഷൻ
ഇല്ലാത്തവന് ഉടുക്കാനില്ലാത്തതിന്റെ പ്രശ്നം
ഉള്ളവന് എങ്ങനെയുടുക്കണമെന്ന പ്രശ്നം
സ്വന്തം നഗ്നത മറക്കാൻ സുഖകരമായി തോന്നുന്നതുടുക്കുക
അതിനു കാണുന്നവനെന്ത്?